মাজুলীৰ জীয়া বাস্তৱক লৈ এখন নতুন অসমীয়া চলচিত্ৰ " বৰনদী ভটিয়ায়"

মাজুলীৰ জীয়া বাস্তৱক লৈ এখন নতুন অসমীয়া চলচিত্ৰ 

ইংৰাজী নৱবৰ্ষৰ পহিলা মাহৰ পৰা হ'ব অনুপম কৌশিক বৰাৰ" বৰনদী ভটিয়ায়" ৰ চিত্ৰগ্ৰহণ 

                                                         নৱ কুমাৰ ভৰালী, ৰি'পৰ্ট 

ঐতিহ্যমণ্ডিত মাজুলীৰ এক জীয়া বাস্তৱ ক মূল আধা‌ৰ হিচাপে লৈ আৰু সমান্তৰাল ভাৱে যন্ত্ৰণাকাতৰ এখিনি মানুহৰ হাঁহি-কান্দোন, সুখ-দুখৰ  কিছুমান জীয়া ছবিক সমল কৰি অনুপম কৌশিক বৰাৰ ৰচনা আৰু পৰিচালনাৰে ভাৱৰীয়া - দ্য টি পজিটিভ্চ য়ে প্ৰথমবাৰৰ বাবে " বৰনদী ভটিয়ায়" শীৰ্ষক এখনি পূৰ্ণ দৈৰ্ঘ্যৰ ছবি প্ৰস্তুতিৰ কাম হাতত লৈছে। 
      মাজুলীৰ বিশিষ্ট নাট্যকৰ্মী তথা মাজুলীৰ পৰা ৰাষ্ট্ৰীয় নাট্য বিদ্যালয়ৰ একমাত্ৰ স্নাতক অনুপম কৌশিক বৰা ৰ এই প্ৰচেষ্টাৰ খবৰে ২০১৭ বছৰটিৰ শেষত আশাৰ বাতৰি কঢ়িয়াই আনিছে। অসমৰ বুকু ফালি বৰনদী ভটিয়ায়। বাৰিষা নদীয়ে বুকু ওফন্দায়। পানী উপৰছনিয়া হৈ দুপাৰলে বান হৈ ঢপলিয়াব খুজিলে মথাউৰি দি পানী ভেটিব লাগে। মথাউৰিয়ে বানৰ বেমাৰ ভাল কৰে। পিছে কেতিয়াবা কেতিয়াবা মথাউৰি ভাগি ভয়ংকৰ বিপদ নামি আহে।  বানে মানুহ-গৰু মাৰে, ঘৰ ভাঙে, খেতি নি:শেষ কৰে। বৰনদীয়ে বুকু ওফন্দাবৰ সময়ত আৰু বানৰ পাছতে পানী কমাৰ সময়ত দুপাৰ খহে। খহনীয়াত মাটি যায় নদীত, অঘৰী হয় বহুজন। কিছুমানে তাকে লৈ ৰাজনীতি কৰে। 

       নিনাদিত মাজুলীয়ে  কৰে আৰ্তনাদ। মাজুলী খহে, মাজুলী উটে। লাহে লাহে মাজুলী নোহোৱা হোৱাৰ উপক্ৰম হব।  মাজুলীৰ বিভিন্ন মনোমোহা লোকেশ্বনত জানুৱাৰী মাহত চিত্ৰগ্ৰহণৰ কাম আৰম্ভ হ'বলগীয়া কথাছবি খন সংগীতেৰে সজাব ৰাষ্ট্ৰীয় বঁটা প্ৰাপ্ত অসমৰ বিশিষ্ট সংগীত শিল্পী তৰালি শৰ্মাই। প্ৰয়াশ শৰ্মা তামুলীয়ে চিত্ৰগ্ৰহণ কৰিব লগা কথাছবি খনৰ সম্পাদনা ৰন্টু চেতিয়াৰ আৰু ধ্বনি পৰিকল্পনা কৰিব দেৱজিৎ গায়নে। 
   
ৰাষ্ট্ৰীয় নাট্য বিদ্যালয়ৰ বহুকেইজন স্নাতকৰ লগতে নতুন প্ৰজন্মৰ কেইবাজনো অতিকৈ সম্ভাৱনময় শিল্পীয়ে অভিনয় কৰিব লগীয়া কথাছবি খনৰ নিৰ্মানৰ খবৰে মাজুলীৰ লগতে ৰাজ্যখনৰ চলচিত্ৰ উদ্যোগটোলৈ বছৰটিৰ শেষত এক আশাৰ বাতৰি কঢ়িয়াই আনিছে।