উত্তৰ-পূবাঞ্চলৰ গাৰোসকল

গাৰোসকলৰ সংস্কৃতি

• নৱ কুমাৰ ভৰালী

ফ্ৰেমত:গোৱালপাৰা জিলাৰ ৱাংগালা কৃষ্টি দল

      ফটোৰ স্থা‌ন: ডিব্ৰুগড়

        তাৰিখ:২২-০৯-২০১৬

      উত্তৰ-পূবাঞ্চলৰ অন্যতম এক বৰ্ণাঢ্য জনগোষ্ঠী হ'ল গাৰোসকল। গাৰোসংস্কৃতি অতিকে চহকী। অসমৰ ২৩ টা অনুসূচিত জনজাতিৰ ভিতৰৰ গাৰোসকলো অন্যতম। অসমৰ গোৱালপাৰা জিলা, কামৰূপ জিলা,ওদালগুৰি জিলা,দৰঙ জিলাৰ উপৰিও মেঘালয়ৰ বিভিন্ন ঠাইৰ লগতে গাৰোপাহাৰ জিলা, ত্ৰিপুৰা বহু অঞ্চলত গাৰোসকলে বসবাস কৰে। গাৰোসকলৰ নিভাঁজ স্বকীয় আচাৰ-নীতিয়ে উত্তৰ-পূবাঞ্চলৰ সমাজ জীৱনত সুকীয়া বৈশিষ্ট্যৰ পৰিচয় দাঙি ধৰি আহিছে। তেওঁলোকৰ পৰম্পৰাগত খাদ্য, সাজপাৰ,কলা-সংস্কৃতিয়ে উত্তৰ-পূবাঞ্চলৰ পৰ্যটনলৈ অনবদ্য অৱদান আগবঢ়ায় আহিছে। নৃতত্ত্ববিদসকলৰ মতে, তিব্বত-বৰ্মী গোষ্ঠীৰ এইসকল মংগোলীয় গোষ্ঠীৰ লোক উত্তৰ-পূব কোনেদি অসমত সোমায় যদিও জীৱন আৰু জীৱিকাৰ সন্ধানত মেঘালয়ৰ পশ্চিম দিশৰ আওহতীয়া পৰ্বতীয়া এলেকাত সৰহীয়াকৈ বসবাস কৰিবলৈ লোৱাৰ পৰিপ্ৰেক্ষিতত সমগ্ৰ পাহাৰীয়া এলেকাটি গাৰো পাহাৰ হিচাপে স্বীকৃত হয়। মেঘালয়ত বসবাস কৰা মাতৃপ্ৰধান জনজাতি খাচীসকলৰ পিছতে গাৰোসকলৰ স্থান। ২০১১ চনৰ সামাজিক লোকপিয়লৰ মতে গাৰোৰ জনসংখ্যা অসমত ১৩৬,০৭৭ জন, মেঘালয়ত ৮২১,০২৬ জন আৰু ত্ৰিপুৰাত ১২,৯৫২ জন বুলি জানিব পৰা যায়।গাৰো সকল প্ৰধানত: খেতিজীৱী।